R. 61/961

DITIONIS GALLIÆ

Instante Exc.mo ac Rev.mo Domino Iosepho Maria Martin, Archiepiscopo Rothomagen. et Præside Commissionis Episcopalis Galliæ de sacra Liturgia et Pastorali, Sacra Rituum Congregatio, vigore facultatum sibi a Sanctissimo Domino nostro IOANNE PAPA XXIII tributarum, benigne indulget ut, in universa Gallia, Solemnitas externa Epiphaniæ Domini peragi valeat quotannis, Dominica festum ipsum Epiphaniæ proxime sequenti, cum altera Missa in cantu et altera lecta, vel cum duabus Missis lectis, tamquam votivis II classis : servatis de cetero rubricis.

Contrariis non obstantibus quibuslibet.

Die 22 Iunii 1961.

† C. Card. CICOGNANI, S. R. C. Præfectus.

Henricus DANTE, a secretis.

A. 22/962

AURELIANEN.

Hodiernus redactor Calendarii diœcesis Aurelianensis, de consensu proprii Ordinarii, Sacræ Rituum Congregationi sequentia dubia pro opportuna solutione exhibuit, nimirum :

1° Num post Codicem rubricarum et Instructionem S. R. C. diei 14 Februarii 1961, solemnitates externæ Epiphaniæ Domini, Ss. Corporis Christi, SS. Petri et Pauli App., necnon Patroni principalis cuiusque loci, adhuc celebrari debeant in diœcesibus Galliæ (salvis tamen nn. 341, 343 et 360 Cod. rubr.), ex decreto Cardinalis Caprara anni 1802.

2° Quæritur in quonam consistant aut constare possint « peculiaria pietatis exercitia » de quibus n. 385 Codicis rubricarum, aut nn. 25 et 34 Variationum in Breviario et Missali romano.

3° Utrum in feriis IV classis, tempore Septuagesimæ (in quibus color Officii diei violaceus est), celebrari possint colore violaceo (ex n. 323 Cod. rubr.) Missæ votivæ IV classis, quibus quidem color albus vel rubeus competit, v. g. Missa de Beata aut de Ss. Eucharistia, vel de Cruce aut de Spiritu Sancto.

4° Quinam sit sensus præscripti n. 457 d circa finem Codicis rubricarum : cum, ex una parte, numerus statutus pro commemorationibus privilegiatis non adsit nisi diebus I et II classis (cfr. n. 111) in quibus oratio imperata non dicitur, et, ex altera parte, diebus liturgicis III et IV classis duæ commemorationes privilegiatæ occurrere non possint.

5° Die 25 Aprilis, in Litaniis maioribus, in locis ubi processio non fit, numquid chorales conventualiter Litanias recitare debeant ? et, si affirmative, qua hora ? an post Laudes, post aliam Horam canonicam, vel quando Superiori placuerit ?

6° Diebus III et IV classis, quando duæ occurrunt commemorationes (de quibus in Codice n. 5), quæritur : in quo ordine dicendæ sunt, cum Tabellæ dierum liturgicorum (n. 91/28) de hac quæstione sileat.

7° Quando festum III classis ad modum commemorationis reducitur, ob diem liturgicum superioris gradus, quæritur : utrum festum hoc habendum sit (v. g. in ordine commemorationum) tamquam vera commemoration (ad mentem Codicis nn. 5 et 108), seu tamquam festum III classis (ad mentem Codicis n. 303).

Et Sacra eadem Rituum Congregatio, re matura perpensa, propositus dubiis respondit :

Ad I. Providebitur.

Ad II. Consulantur probati auctores.

Ad III. Negative.

Ad IV. Verba illa addita sunt ad abundantiam.

Ad V. Chorales Litanias conventualiter recitare debent, quando Superiori placuerit.

Ad VI. Ordine n. 23 Tabellæ præcedentiæ indicato.

Ad VII. Habetur tamquam festum III classis.

Atque ita rescripsit et declaravit, die 21 Martii 1962.

Henricus DANTE, S. R. C. a secretis.

Joachim SORMANTI, Substitutus.

Soutenir le Forum Catholique dans son entretien, c'est possible. Soit à l'aide d'un virement mensuel soit par le biais d'un soutien ponctuel. Rendez-vous sur la page dédiée en cliquant ici. D'avance, merci !